DeepRoute.ai Xitoyda Tesla’ning FSD texnologiyasidan oldinga o’tish maqsadida 100 million dollar jalb qildi
Shenchjenda joylashgan avtomatlashtirilgan boshqaruv texnologiyalari startapi DeepRoute.ai Great Wall Motor kompaniyasidan 100 million dollar sarmoya oldi. Reuters xabariga ko’ra, kompaniya 2025 yilga qadar Xitoy bozoridagi ko‘plab avtomobillarga o‘z avtonom boshqaruv tizimlarini o‘rnatishni rejalashtirmoqda, bu orqali Tesla Xitoyda o‘z faoliyatini boshlashidan oldin kuchliroq pozitsiyani egallashga intilmoqda.
DeepRoute o‘zining avtomobil ishlab chiqaruvchi sarmoyadorini ommaga oshkor qilmagan bo‘lsa-da, Xitoy OAVlarida, jumladan, press-relizda bu Great Wall Motor ekanligi ta’kidlanmoqda. Great Wall Motor – Xitoyning yirik avtomobil ishlab chiqaruvchilaridan biri bo‘lib, yilning dastlabki 10 oyida yangi avtomobillarning 970,612 donasini sotishga muvaffaq bo‘ldi. Kompaniya Yevropada ham o‘z faoliyatini kengaytirmoqda va BMW bilan hamkorlikda yangi Mini EV avtomobilini ishlab chiqish ustida ishlamoqda.
Alibaba tomonidan qo’llab-quvvatlanadigan DeepRoute dastlab Level 4 darajadagi robotaksi tadqiqoti va ishlab chiqish bilan shug‘ullangan edi, ammo 2022 yilda kompaniya o‘z strategiyasini o‘zgartirib, Level 2+ va Level 3 darajadagi avtonom boshqaruv texnologiyasini ishlab chiqishga yo‘naltirdi. SAE (Avtomobil muhandisligi jamiyati) ma’lumotiga ko‘ra, Level 4 tizimlari ma’lum sharoitlarda inson aralashuvisiz o‘z-o‘zini boshqara oladi. Level 2+ va Level 3 tizimlari esa inson e’tiborini talab qiladi va tizim kerakli paytda haydovchidan boshqaruvni o‘z zimmasiga olishni so‘raydi.
TechCrunch’ga ko’ra, DeepRoute vakili kompaniya ushbu sarmoyani visual-til-harakat modellari asosida yangi tizimni ishlab chiqishga sarflashini ma’lum qildi. Ushbu texnologiya turli vizual va og’zaki ma’lumotlarni bevosita qabul qilib, to‘g‘ridan-to‘g‘ri haydash qarorlarini qabul qila oladi. Bu esa sezgi, rejalashtirish va boshqaruvni alohida jarayonlarga bo‘linishdan qochishga imkon beradi. Shuningdek, DeepRoute kelajakda global robotaksi biznesini rivojlantirish va boshqa avtomobil ishlab chiqaruvchilar bilan hamkorlik imkoniyatlarini o’rganishni rejalashtirmoqda.
DeepRoute uchun ayni paytda eng muhim vazifa avtomobil ishlab chiqaruvchilar bilan hamkorlik qilishdir, ayniqsa, Tesla’ning Full Self-Driving (FSD) deb nomlanuvchi haydovchiga yordam tizimi 2025 yilning birinchi choragida Xitoy va Yevropada ishga tushirilishi kutilayotgan bir vaqtda. Xitoyda Tesla avtomobillariga qilingan ayrim cheklovlar aprel oyida olib tashlangani sababli, kompaniya FSD ni joriy qilishga yo‘l ochildi. Bu tizim to‘liq avtonom haydovchilik imkoniyatiga ega emas, lekin shahar va magistrallarda ayrim avtomatlashtirilgan vazifalarni bajara oladi.
DeepRoute 2025 yil oxirigacha Xitoyda 200 ming avtomobilga o‘z avtonom boshqaruv tizimini o‘rnatishni rejalashtirganini aytdi. Bu bugungi kunda o‘rnatilgan 20 ming avtomobildan 10 barobar ko‘pdir.
DeepRoute tizimi birinchi marta joriy yilning avgust oyida noma’lum bir modelda ishlatila boshlandi. Kompaniya ma’lumotlariga ko’ra, bu texnologiya yil davomida yana ikkita modelda, jumladan, Geely va Mercedes-Benz qo‘shma mulkiga tegishli modelda qo‘llaniladi.
DeepRoute avtomobil ishlab chiqaruvchilaridan har bir avtomobil uchun texnologiya litsenziya to‘lovini oladi va murakkab transport sharoitlarini boshqarish uchun sun’iy intellektini o‘rgatish maqsadida ma’lumot to‘playdi.
